Татарстан Президенты Финанс-бюджет күзәтчелеге федераль хезмәте җитәкчесе Александр Смирнов белән очрашты

Бүген Татарстан Республикасы Президенты Р.Н. Миңнеханов Финанс-бюджет күзәтчелеге федераль хезмәте җитәкчесе Александр Смирнов белән очрашты. Татарстан Республикасы Хөкүмәте Йортында узган очрашуда шулай ук Татарстан Республикасы Премьер-министры вазыйфаларын башкаручы Равиль Моратов, Татарстан Республикасы Президентының икътисадый мәсьәләләр буенча ярдәмчесе Айрат Хәйруллин, Финанс-бюджет күзәтчелеге федераль хезмәтенең Татарстан Республикасындагы Территориаль идарәсе җитәкчесе Әминә Хөсәенова катнашты.

 Очрашу барышында Александр Смирнов Татарстан Президентына Финанс-бюджет күзәтчелеге федераль хезмәтенең Татарстан Республикасындагы Территориаль идарәсенең яңа җитәкчесе Әминә Хөсәенованы тәкъдим итте, ул яңа вазыйфага Россия Федерациясе Финанс министрлыгы боерыгы нигезендә 2013 елның 1 августыннан билгеләп куелган иде. Рөстәм Миңнеханов Александр Смирновка республикага күрсәткән игътибары өчен рәхмәт белдерде һәм Территориаль идарәнең яңа җитәкчесе Әминә Хөсәеновага эшендә уңышлар теләде.  

Шулай ук очрашу яклары Финанс-бюджет күзәтчелеге федераль хезмәтенең Татарстан Республикасындагы Территориаль идарәсенең киләчәктәге эше мәсьәләләре буенча фикер алышты.