Бюджет, салымнар һәм финанслар комитеты утырышында Хөкүмәтнең 2022 елдагы эшчәнлеге турындагы хисап каралды
Бүген Бюджет, салымнар һәм финанслар комитеты утырышында 2022 елда Татарстан Республикасы Министрлар Кабинеты эшчәнлеге нәтиҗәләре турындагы хисап каралды. Шулай итеп, Дәүләт Советында төп документ турында фикер алышу дәвам итә, анда Хөкүмәтнең еллык эшенә йомгак ясала.
Хөкүмәт хисабын тәкъдим итү алдыннан җитди эш бара. Тармаклар буенча эшчәнлек нәтиҗәләре республика министрлыкларының һәм ведомстволарының йомгаклау коллегияләрендә ясала, Хөкүмәтнең әзерләнгән хисабы депутатларга танышу өчен җибәрелә, ә аннары хисап парламентның барлык профильле комитетлары утырышларында тикшерелә.
Әлеге мәсьәлә буенча төп доклад белән Татарстан Республикасы Икътисад министрының беренче урынбасары Олег Пелевин чыгыш ясады. Ул республикадагы гомуми икътисадый вәзгыять һәм бизнеска ярдәм итү һәм икътисадның тотрыклылыгын тәэмин итү өчен хөкүмәт тарафыннан күрелгән чаралар турында сөйләде.
Комитет утырышында Татарстан Республикасы Финанс министры урынбасары Алексей Шишкин чыгыш ясады. Ул бюджет сәясәте һәм республиканың бюджет системасының баланслылыгын тәэмин итү мәсьәләләренә тукталды.
Узган ел ТР бюджетына 366,6 млрд.сумлык салым һәм салым булмаган керемнәр мобилизацияләнгән, ягъни план күрсәткечләренең 101,9% ы. Федераль бюджеттан һәм башка чыганаклардан республикага 86,1 млрд. сум җәлеп ителгән.
2022 елда республикада 34 дәүләт программасы гамәлдә булган, аларны тормышка ашыруга 430,6 млрд.сум акча юнәлтелгән, шулардан федераль бюджет акчалары – 73,1 млрд. сум, Татарстан Республикасы бюджеты акчалары – 357,5 млрд. сум. Гомумән алганда, узган ел республика бюджеты чыгымнары 463,2 млрд.сум тәшкил иткән.
Алексей Шишкин бюджет хезмәткәрләренең аерым категорияләренең хезмәт хакы буенча «май указларын» гамәлгә ашыруга аерым тукталды. "2022 ел йомгаклары буенча Россия Федерациясе Президенты йөкләмәсе белән билгеләнгән аерым категория хезмәткәрләрнең хезмәт хакы күрсәткечләре тулы күләмдә үтәлде", - диде ул.
2022 елда Татарстан Республикасы башкарма хакимияте органнары эшчәнлеге турында хисап профильле комитет әгъзалары тарафыннан игътибарга алынды. Дәүләт Советы Президиумына әлеге мәсьәләне парламентның шушы арада булачак утырышы көн тәртибенә кертергә тәкъдим ителде.