Гыйнвар-апрельдә РФ бюджеты кытлыгы 3,4 трлн сум тирәсе тәшкил иткән

Федераль бюджет кытлыгы, РФ Финанс министрлыгының беренчел бәяләве буенча, 2023 елның гыйнвар-апрелендә 3,4 трлн сум тәшкил иткән.

Алдан ясалган бәяләүләр буенча федераль бюджетның 2023 елның гыйнвар-апрель айларында керемнәре күләме 7 782 млрд сум тәшкил иткән, бу 2022 елның шул ук чоры өчен керемнәр күләменнән 22 процентка түбәнрәк. Шул ук вакытта төп нефть-газ булмаган керемнәр керү өлешендә – федераль бюджетта да, тулаем алганда бюджет системасында да – тотрыклы уңай динамика күзәтелә.

Федераль бюджет чыгымнарының беренчел күләме 2023 елның гыйнвар-апрелендә 11 206 млрд сум тәшкил иткән, бу узган елның шул ук чоры күрсәткечләреннән 26%ка артыграк. Шул рәвешле, хисап чорында бюджет кытлыгы 3,4 трлн сумга диярлек җиткән.

Нефть-газ булмаган керемнәр керүнең һәм чыгымнарны финанслауның динамикасы агымдагы елның гыйнварыннан апрельгә кадәр чорда федераль бюджет үтәлешенең акрынлап нормальләшүе турында сөйли һәм тулаем алганда бюджет турындагы закон параметрларына туры килә.

Тулаем алганда, 2023 елда федераль бюджет чыгымнары күләме бюджет турындагы законда расланган бюджет ассигнованиеләренең чик күләменнән һәм ел дәвамында өстәмә нефть-газ булмаган керемнәр керү күләменнән ("бюджет кагыйдәләре" нормалары нигезендә) чыгып формалаштырылачак. Бу бюджет турындагы закон параметрлары дәрәҗәсендә беренчел структур кытлыкның тотрыклылыгын тәэмин итә.