Бюджет процессында берничә төп новацияне күздә тота торган Бюджет кодексына төзәтмәләр турында
Бюджетлар арасында аерым керемнәрне бүлү нормативлары беркетелә. Закон проекты региональ, муниципальара яисә җирле әһәмияттәге юллар буенча авыр йөкле, эре габаритлы транспорт хәрәкәте кагыйдәләрен һәм югары әзерлек режимын бозган өчен административ штрафлардан алынган керемнәрне региональ бюджетларга даими рәвештә беркетә.
Төзәтмәләр Бюджет кодексында шулай ук узган елларда оешмаларның артык табышына салымны бюджет керемнәренең бер төре буларак беркетә, ул федераль бюджетка 100% норматив буенча күчереләчәк.
Документ юл фондларын формалаштыруның яңа чыганакларын беркетүне тәкъдим итә: федераль юл фонды өчен – дәүләт мөлкәтен концессия килешүләре шартлары буенча файдаланудан алынган керемнәр, региональ һәм муниципаль юллар өчен – авыр йөкле транспорт тарафыннан юлларга китерелә торган зыянны каплауга түләү һәм мондый транспорт хәрәкәте кагыйдәләрен бозган өчен штрафлар.
Дәүләт финанслары турында белешмәләрне интеграцияләүнең бердәм дәүләт системасын төзү өчен «Электрон бюджет» дәүләт мәгълүмат системасына Россия Федерациясенең, федераль бюджет һәм автоном учреждениеләрнең финанс һәм финанс булмаган активлары һәм йөкләмәләре турында мәгълүмат урнаштыру таләбе беркетелә.
Закон проекты шулай ук юридик затларга субсидияләрне бюджет классификациясе чыгымнарының бер төркеменә берләштерә. Бу субсидияләрне юридик затларга җиткерү срокларын киметәчәк һәм җыелма бюджет язмасына үзгәрешләр кертү зарурлыгын бетерәчәк.