Рөстәм Миңнеханов Халыкара валюта фонды делегациясе әгъзалары белән очрашты

Бүген Татарстан Республикасы Президенты Рөстәм Миңнеханов Халыкара валюта фонды делегациясе әгъзалары белән очрашты.
Очрашу Татарстан Президентының Казан Кремлендәге резиденциясендә узды.
Исегезгә төшерәбез, Халыкара валюта фонды (ХВФ) делегациясенең Россиягә эш визиты 1 сентябрьдә башланды һәм 17 сентябрьгә кадәр дәвам итәчәк. ХВФ белгечләре Россия Федарациясендә һәм аның регионнарында салым администрирацияләвен өйрәнәчәкләр. Алар Мәскәүдә, Уфада, Казанда, Түбән Новгородта булырга планлаштыралар, Россия Федераль салым хезмәтенең регионнардагы эше белән танышырга, ФСХнең районара инспекцияләрендә булырга җыеналар. ХВФ делегациясенә ХВФның Салым һәм бюджет мәсьәләләре департаменты җитәкчесе урынбасары, Европа, Азия һәм Якын Көнчыгыш илләре керемнәрен администрацияләү бүлеге башлыгы Хуан Анхел Торо Ривера җитәкчелек итә.
Кунакларны сәламләп, Рөстәм Миңнеханов кыскача гына аларны Татарстан Республикасындагы икътисадый ситуация белән таныштырды. Ул, аерым алганда, хәбәр иткәнчә, 2012 елда җыелма региональ продукт (ҖРП) Татарстанда 1, 415 трлн. сум тәшкил итте, алдагы елга карата үсеш 5,5%. 2013 гелда республикада үсеш 1,3% кына, гәрчә икътисад тармаклары яхшы күрсәткечләр белән барса да, диде Рөстәм Миңнеханов.
Татарстан Республикасы икътисады – экспортка юнәлешле, дип билгеләп үтте Татарстан Республикасы Президенты, асылда нефть һәм аны эшкәртү продуктлары, машина- һәм авиатөзелеш продукциясе, компрессорлар һәм башка сәнәгать товарлары экспортлана. Нефть чыгару икътисад структурасында зур урын били, Татарстан елына 32 млн. тоннага якын нефть чыгара. Барысы 70 ел эчендә республикада 3,1 млрд. тонна углеводород чималы чыгарылган. Иң күп чыгарылган елларда 100әр млн. тонна, бу 70 нче елларга туры килде.
Бүгенгә сәнәгать юлы белән чыгарыла торган нефть 100 млрд. тонна, дип хәбәр итте Рөстәм Миңнеханов, моннан тыш, республикада битум нефте запаслары бар, аларны чыгаруга Канада тәҗрибәсен дә кулланып керешелде инде. Сланец нефтен эшкәртүгә җитди игътибар бирелә. Татарстан территориясендә 15 млн. тоннага якын нефть эшкәртелә, диде Рөстәм Миңнеханов, мөһим бурычларның берсе – чыгарылган нефть күләменең 2/3ен эшкәртеп бару.
Татарстанга шулай ук Россиядә җитештерелә торган пластмасса күләменең яртысы туры килә, республика – синтетик каучук җитештерү буенча илдә иң эреләрнең берсе.
Автомобиль комплексында “КАМАЗ” – сәнәгать гиганты зур урын били, авто җитештерүчеләрнең тагын берсе – “Форд-Соллерс” компаниясе.
Татарстан шулай ук граждан һәм хәрби авиа- һәм вертолет төзелеше продукциясе җитештерә.
Россия регионнары арасында Татарстан – иң динамик үсә торган федерация субъектларының берсе, ул сәнәгать җитештерүе күләмнәре, төп капиталга инвестицияләр кертү күләме, торак төзелеше күләмнәре буенча регионнар бишлегенә керә.
ҖРП структурасында салым түләүләренең чагыштырма зурлыгы 23-24% тәшкил итә, дип хәбәр итте Рөстәм Миңнеханов, һәм бүген барлык дәрәҗәләрдә салым системасы нәтиҗәле һәм сыйфатлы эшләп килә. Татарстанда салу өлкәсендә, аерым алганда, күчемсез мөлкәткә бердәм салым кертү өлешендә салым сынау проекты гамәлгә ашырыла.
Татарстан Республикасы Президенты билгеләп үткәнчә, бүген Федераль салым хезмәтенең Татарстан Республикасы буенча идарәсе матди-техник базасы ныгытылган, яңа технологияләр актив рәвештә кертелә. Безнең салым хезмәтләренә бернинди дә сорауларыбыз юк, диде ул, салым органнары системасын модернизацияләү һәм мәгълүмат технологияләрен гамәлгә кертү салымнар җыюны тәэмин итәргә ярдәм итә.
Рөстәм Миңнеханов тагын республикада дәүләт хезмәт күрсәтүләрен электрон рәвештә кертү турында, шул исәптән салымнар, дәүләт пошлиналары, ГИБДД штрафларын электрон рәвештә түләү мөмкинлеге турында сөйләде.
ХВФның Салым һәм бюджет мәсьәләләре департаменты җитәкчесе урынбасары, Европа, Азия һәм Якын Көнчыгыш илләре керемнәрен администрацияләү бүлеге башлыгы Хуан Анхел Торо Ривера үз чиратында Рөстәм Миңнехановка ХВФ делегациясен җылы кабул итүе өчен рәхмәт белдерде.
Сезнең республика бүген экспортның югары дәрәҗәсе һәм дөньяның башка илләре белән тыгыз элемтәдә булуы белән характерлана, диде Хуан Анхел Торо Ривера, бу нефть кенә түгел, машина төзелеше комплексының, авиатөзелешнең катлаулы продукциясе дә. Иң мөһиме - Татарстан кризиска каршы тора алырлык көчкә ия. Тагын шунысы аеруча әһәмиятле – сез, эре сәнәгать проектлары белән бергә, кече һәм урта бизнеска үсәргә ярдәм итәсез, дип ассызыклады Хуан Анхел Торо Ривера.
ХВФ делегациясе әгъзалары бүген салым органнарының һәм салым администрацияләвенең роле киләчәктә һәр ил икътисады үсешендә мөһим булачагына басым ясадылар. Салымнар түләүдә җаваплылыкны сизә белергә, законнарны үтәргә кирәк, дип саный ХВФ вәкилләре, салым системасын модернизацияләү икътисад үсешен стимуллаштырачак, салым администрирацияләве уңайлы инвестицион климат урнаштырачак.
Без Россиягә булган тәҗрибәбез белән уртаклашырга килдек, әмма без сездән дә күп нәрсәгә өйрәнә алачакбыз, дип йомгак ясады Хуан Анхел Торо Ривера.