Дәүләт Советы комитетларында бюджет турындагы закон проекты буенча фикер алышу дәвам итә

Бүген Дәүләт корылышы һәм җирле үзидарә комитеты утырышында депутатлар 2025 елга һәм 2026 һәм 2027 елларның планлы чорына Татарстан Республикасы бюджеты турындагы закон проектын карадылар. Утырыш республиканың тармак министрлыклары һәм ведомстволары вәкилләре катнашында узды.

Дәүләт корылышы һәм җирле үзидарә комитеты карамагындагы бүлекләр һәм маддәләр өлешендә «2025 елга һәм 2026 һәм 2027 елларның план чорына ТР бюджеты турында» ТР законы проекты белән депутатларны ТР финанслар министры урынбасары Гела Герасимова таныштырды.

Татарстанда 956 җирле бюджет, шул исәптән 2 шәһәр округы, 43 муниципаль район һәм 911 җирлек бар.

«Муниципаль берәмлекләр бюджетларына гомуми характердагы финанс ярдәме 2025 елга 54,5 млрд сум күләмендә каралган, – дип билгеләп үтте министр урынбасары. – Күрсәтелгән финанс ярдәме күләме бюджетлар формалаштыруның сценарий шартларында 2025-2027 елларга җирле бюджетларның баланслылыгын тулысынча тәэмин итәргә мөмкинлек бирәчәк».

Муниципаль районнарның җирле үзидарә органнарына Татарстан Республикасы бюджеты акчалары исәбеннән шәһәр, авыл җирлекләре бюджетларына дотацияләр исәпләү һәм бирү буенча дәүләт вәкаләтләрен бирү турындагы республика законы нигезендә муниципаль районнарның җирле үзидарә органнарына республика бюджеты акчалары исәбеннән тиешле субвенцияләр бирелеп, күрсәтелгән дәүләт вәкаләтләре бирелде.

Закон проектында 2025 - 2027 елларга муниципаль берәмлекләрнең чыгым йөкләмәләрен үтәүне финанс белән тәэмин итү өчен Муниципаль берәмлекләр бюджетларына ел саен 428,9 млн сум күләмендә бюджетара трансфертлар каралган.