Республиканың өчъеллык бюджетының икенче укылышына карата 368 төзәтмә кергән

Бүген Бюджет, салымнар һәм финанслар буенча комитеты утырышында катнашучылар “Татарстан Республикасының 2009 елга һәм 2010, 2011 елларның планлы чорына бюджеты турында” ТР закон проектын икенче укылышка әзерләде. Утырышта ТР Президентының Дәүләт-хокук идарәсе башлыгы Рәисә Сахиева, ТР Премьер-министрының беренче урынбасары Равил Моратов, ТР Дәүләт Советы урынбасары Александр Гусев катнашты. Бюджет проектын турында сөйләшү ара-тирә зур бәхәсләргә дә әйләнеп киткәләде.
Комитет рәисе Илсур Сафиуллин хәбәр иткәнчә, алдагы елларның бюджет проектына карата 368 төзәтмә кергән. Иң күп төзәтмәләр – КПРФ партиясенең фракциясе әгъзаларыныкы, шулай ук “Бердәм Россия” партиясе, ТР Министрлар Кабинеты, парламент комитетлары да үз тәкъдимнәрен керткән.
ТР Финанслар министры Радик Гайзатуллин хәбәр иткәнчә, ТР Министрлар Кабинетыннан кертелгән 51 тәкъдим биш төркемгә бүленә. Әлеге тәкъдимнәр транспорт оешмаларын финанслауга, җирле үзидарә органнарына бирелгән вәкаләтләрне тормышка ашыруга, метрополитен төзүгә, ташламалы шартларда торак алуга хокуклы кешеләргә ярдәм итүгә, капиталь ремонт программасын тормышка ашыруга ТР Урман хуҗалыгы министрлыгының чыгымнарын арттыруга кагылышлы. Бүген депутатлар әлеге төзәтмәләрне хуплап тавыш бирде.
Шунысын билгеләп үтәргә кирәк: парламентның башка комитетларыннан бюджет проектына карата социаль характердагы төзәтмәләр дә күп кергән. Мәсәлән, Социаль комитет рәисе Чыңгыз Мәхмүтов бюджетка керәчәк өстәмә керемнәр хисабына Казандагы сугыш ветераннары госпитален һәм Яр Чаллыдагы госпитальне тәзекләндерү, өлкән инвалидлар һәм яшүсмерләр өчен республикакүләм социаль тернәкләндерү үзәге төзү өчен өстәмә финанслар карауны сораган иде. Депутатлар әлеге мәсьәләне протоколга кертеп, алга таба хәл итү юлларын карарга булды.
Бүген комитет депутатлары хуплап тавыш биргән төзәтмәләр арасында “Бердәм Россия” партиясе фракциясеннән – автомобиль юллары төзү һәм тәзекләндерү, капиталь салулар, генераль планнар эшләү турындагысы да бар иде. Депутат Марат Галиев билгеләп үткәнчә, әгәр бу максатларга акча бирелсә, федераль бюджеттан да акча киләчәк.
Депутатлар фикер алышу вакытында ТРның 2009 елга бюджеты дефицитын финанслау чыганаклары, авыл хуҗалыгына өстәмә акчалар бүлеп бирү (моның өчен 100 млн.сум акча сорала) турындагы төзәтмәләрне хуплады.
Республиканың 2009 ел бюджетының чыгым өлешен арттыруга юнәлтелгән төзәтмәләрне караганда Татарстан Республикасында Кеше хокуклары буенча вәкил тарафыннан кертелгән тәкъдимнәр кызу бәхәсләр уятты. Эш шунда: вәкилгә фенилкетонурия дигән авыру белән чирләүче балаларның ата-аналары тиешле дарулар белән тәэмин итүдә проблемалар барлыгы турында хатлар юллаган. Әлеге авыруны дәвалау өчен өстәмә рәвештә 24,5 млн. сум акча сорала. Депутатлар бу проблеманы хәл итү буенча ТР Сәламәтлек саклау министрлыгы тарафыннан билгеле бер күләмдә эш башкарылуы турында ишеткәч, әлеге юнәлештәге чараларны камилләштерүне сорады.
Депутат Флера Зыятдинова исә 2010 елда финанслау тәмамланачак “Яшь гаиләләрне торак белән тәэмин итү” программасын 2011 елда дәвам итү мәсәләсен күтәреп чыкты. Радик Гайзатуллин, бу сорауга җавап биреп, әлегә бу программа буенча федераль үзәктән киләчәк акчаларның күләме билгеле булмавы, 2010-2011 елларда аның яңадан каралачагын билгеләп үтте.