Ташламаларга ия гражданнар өчен транспортта йөрүнең төбәк стандарты чыгарылды

Бњген өченче чакырылыш ТР Дәүләт Советы депутатлары сессиядә “Татарстан Республикасында муниципаль берәмлекләренең җирле үзидарә органнарына ТР территориясендә гражданнарның аерым категорияләре өчен җәмәгать транспорты хезмәтләреннән бертигез дәрәҗәдә файдалануны тәэмин итү өлкәсендә аерым дәүләт вәкаләтләре бирү турында” ТР законы проектын тулаем кабул итте.
Әлеге закон проекты ТРның җирле үзидарә органнарына гражданнарның аерым категорияләренә транспорт хезмәтләре күрсәтүгә бәйле рәвештә тотылган чыгымнарны исәпләп чыгару һәм транспорт оешмаларына акча бирү буенча дәүләт вәкаләтләрен тапшыруны күздә тота. Закон проекты нигезендә җирле үзидарә органнарына дәүләт вәкаләтләре чикләнмәгән вакытка бирелә.
ТР Финанслар министры Радик Гайзатуллин хәбәр иткәнчә, 2009 елда әлеге вәкаләтләрне тормышка ашыру өчен барлыгы 392, 2 млн. сум акча кирәк. Аның 287 млн. сумы республика бюджетыннан бүленә.
Казан шәһәре мэры Илсур Метшин башкалада 340 меңнән артык ташламага ия булган кеше яшәвен билгеләп үтеп, алга таба аларның исемлеген йә кыскартырга, йә шәхси транспортчылар исәбенә йөртергә, йә алар өчен тотылган чыгымнарны тулысынча капларга кирәклеген белдерде.
ТР Премьер-министры Рөстәм Миңнеханов, әлеге мәсьәләгә ачыклык кертеп, моңарчы ташламаларга ия булган гражданнарның транспортта күпме йөргәнлеге билгеле булмавы, хәзер инде чынбарлыкны күзалларга мөмкин булуын әйтте. Аның сүзләренә караганда, ташламалы бер юл билетына уртача 50 тапкыр кайдадыр барып-кайту туры килә. Шул рәвешле төбәк стандарты чыгарылган. Шулай итеп, агымдагы елда транспорт оешмаларына, ташламаларга ия булган гражданнарны йөрткән өчен, 165 млн. сум акча бүлеп бирү планлаштырыла. Р. Миңнеханов фикеренчә, бу максатларда бүленгән акчаларны аз дип санап булмый.