Илдар Халиков: “Легаль булмаган алкоголь базары үсешен туктатырга кирәк”

Татарстанда легаль булмаган алкоголь продукциясе үсешенә каршы эшчәнлек республика хакимияте органнары, җирле үзидарә, җәмәгать оешмалары һәм халыкның гомуми бурычы булырга тиеш. Мондый фикерне бүген ТР Премьер-министры Илдар Халиков ТР Дәүләт алкоголь инспекциясе коллегиясендә чыгыш ясаганда белдерде.

Коллегия утырышы алдыннан ТР Премьер-министры Илдар Халиков, алкоголь базарын җайга салу Федераль хезмәтенең Идел буе федераль округы буенча төбәкара идарәсе башлыгы Евгений Качалин һәм “Татспиртпром” ААҖ генераль директоры Гиоргий Куприянов белән очрашып, алкоголь җитештерүендәге проблемалар турында фикер алыштылар.

Коллегиядә ТР Дәүләт алкоголь инспекциясенең эшчәнлек нәтиҗәләре турында аның җитәкчесе Игорь Марченко доклад ясады. Ул хәбәр иткәнчә, 2013 елда гражданнар мөрәҗәгатьләренең кимүе күзәтелгән (2012 нче елда - 23823, 2013 нче елда - 21979 мөрәҗәгать).

Дәүләт алкоголь инспекциясе эшчәнлегендә алкоголь продукциясенең сыйфатын, куркынычсызлыгын һәм аны легаль рәвештә җитештерүне, аның әйләнешен контрольдә тоту мөһим бурыч булып кала, дип белдерде аның җитәкчесе. 2013 нче елда Татарстанга 6 меңнән артык атамада 30 млн.литр алкоголь продукция кертелгән һәм тикшерелгән. 680 мең литрдан артыгы ГОСТ таләпләренә туры килми дип табылган.

2012 ел белән чагыштырганда, 2013 нче елның 12 аенда республика предприятиеләре җитештергән алкоголь продукциясенең күләме 34 процентка арткан һәм 94,45 млн. литр тәшкил иткән.

Шуның белән бергә, Игорь Марченко белдергәнчә, Татарстанда алкоголь продукциясен легаль рәвештә сату кимегән. Ә бу аның легаль булмаган әйләнешенең артуын күрсәтә. “Без бәяләгәнчә, барлык алкоголь продукциясенең легаль булмаган әйләнешенең өлеше кимендә 10 процент, ә аракыныкы - 20 процентка кадәр”, - диде ул.
2013 нче елда Татарстанда алкогольдән агулану очрагы 40%ка арткан, үлем очрагы 15 % ка.
Алкоголь базарын җайга салу федераль хезмәтенең Идел буе федераль округы буенча төбәкара идарәсе башлыгы Евгений Качалин үзенең чыгышында, ТР Дәүләт алкоголь инспекциясе эшчәнлегеннән канәгать булуын белдерде.

ТР Премьер-министры Илдар Халиков Татарстанда легаль булмаган алкоголь базарының үсеше турындагы күңелсез статистикага игътибар ясады. “Без билгесез кешеләрнең Татарстан халкын агулавы белән килешергә тиеш түгел”, - диде ул.
Премьер-министр республикага легаль булмаган алкогольне кертүгә генә түгел, ә аны сатуга да каршы көрәшергә чакырды. “Легаль булмаган аракыны эчеп кенә калмыйлар, аны саталар да, - дип билгеләде ул. – Без легаль булмаган алкоголь продукцияне сату урыннарын контрольдә тотарга тиеш”. Ул, аерым алганда, алкоголь белән сату итүче таксистларның лицензиясен алуны тәкъдим итте.

Илдар Халиков шулай ук кайбер уңай нәтиҗәләрне дә билгеләде. “Татспиртпром” алдында торган бурычлар үтәлгән. “Компания югары сыйфатлы продукция җитештерә”,- диде ул.

“Быел безгә легаль булмаган алкоголь продукция базары мәсьәләләре белән җитди шөгыльләнергә кирәк. Бу проблеманы хакимиятнең барлык органнары, җәмәгать оешмалары, халык белән бергә генә хәл итәргә мөмкин”, - дип нәтиҗә ясады Илдар Халиков.