Идел буе округы финансистлары Казанда җәмәгать финанслары белән нәтиҗәле идарә итәргә өйрәнде
Казанда РФ Финанс министрлыгы вәкилләре, Татарстанның финанс өлкәсендә эшләүче белгечләр, Идел буе федераль округындагы барлык республика һәм өлкәләрнең финанс министрлары катнашында семинар-киңәшмә булып узды. Анда дәүләт һәм муниципаль финанслар белән идарә итүнең нәтиҗәсен яхшырту мәсьәләләре тикшерелде.
Семинар кысаларында РФ финанс министры урынбасары Алексей Лавров “2014 елда бюджет законына яңалыклар кертү” дигән темага чыгыш ясады. ТР финанс министры Радик Гайзатуллин исә республикада дәүләт һәм муниципаль финанслар белән эш итүнең нәтиҗәсен яхшырту юллары турында сөйләде.
Киңәшмәдә соңгы дистә ел эчендә илебездә җәмәгать финанслары нәтиҗәсен яхшырту чараларының эзлекле төстә тормышка ашырылуы искәртелде. Декабрь аенда әлеге мәсьәлә буенча чираттагы – дүртенче федераль программаның кабул ителүе турында әйтелде.
Шулай ук, Татарстан да акча белән идарә итүнең нәтиҗәсен яхшырту юлыннан бара. 2007 елда кабул ителгән беренче программа нигезендә, бюджет ресурслары белән эш итү сыйфатын яхшырту, бюджет чыгымнарын киметү чаралары этаплап тормышка ашырыла. Социаль тармакка, идарә аппараты өлкәсенә нормативлар кертү, сатып алулар өлкәсендә аукционнар үткәрү программаны тормышка ашыру нәтиҗәләреннән берсе булып тора. Бу чаралар бюджет акчасын сакчыл тотуга китерә.
ТР Хөкүмәте карары нигезендә, дәүләт һәм муниципаль акча белән нәтиҗәле эшләүнең яңа программасы кабул ителде. Бюджет белән бергә 12 елга озак сроклы бюджет стратегиясен раслау яңа программаның төп үзенчәлекләреннән берсенә әйләнәчәк. Озак срокка исәпләнгән бюджет стратегиясе һәм социаль-икътисадый үсеш фаразы мәгариф, сәламәтлек саклау, мәдәният, социаль тәэминат өлкәләрендә халыкка күрсәтелә торган хезмәтләрнең сыйфатын яхшыртуга юнәлдерелгән дәүләт программалары нигезенә әйләнәчәк. Төрле яктан мониторинг үткәрү дә программаның үзенчәлеге булып тора. Бюджет акчасын тотучылар эшчәнлегенең конкрет күрсәткечләре анализланачак. Бюджет учреждениеләренә акча бүлеп бирү ирешелгән күрсәткечләренә турыдан-туры бәйле булачак. Бер үк вакытта идарә аппаратының, дәүләт учреждениеләренең эш сыйфаты бәяләнәчәк, дәүләт һәм муниципаль финанс контрольлеге камилләштереләчәк. Шулай итеп, бюджет чыгымнарының нәтиҗәсен арттыру күздә тотыла.
Киңәшмәдә, алга таба Россия Федерациясенең башка субъектларына таратуның максатка ярашлы булуы-булмау мәсьәләсен хәл итү өчен, аерым төбәкләрнең бюджет процессына уңай яңалыклар кертүне анализлау тәкъдим ителде.