Татарстан Республикасында “Лизинг-грант” программасы буенча финанслауның гомуми күләме 500 млн сумнан артык тәшкил итә

Бүген Татарстан Республикасы Министрлар Кабинетында узган брифингта кече һәм урта бизнеска ярдәм итүгә юнәлдерелгән республика программаларын гамәлгә ашыру турында сүз барды. Алар турында ТР икътисад министры Мидхәт Шаһиәхмәтов сөйләде.

Министр Татарстанда кече һәм урта эшмәкәрлек секторының 140 мең эшмәкәрлек субъектыннан гыйбарәт булуын искәртте, бүгенге көндә аларда 480 меңгә якын кеше мәшгуль. Ул билгеләп үткәнчә, быел кече һәм урта эшмәкәрлек субъектлары санының тотрыклылыгы күзәтелә. Узган ел белән чагыштырганда, производство бизнесында, сәнәгатьтә кече һәм урта предприятиеләр саны үсештә. Моннан тыш, производство белән бәйле бизнес үсешендә дә уңай динамика күренә.

Мидхәт Шаһиәхмәтов узган елда берничә инфраструктура объекты булдырылганы турында сөйләде, шул исәптән ТР эшмәкәрлеккә ярдәм үзәге, ярдәм программалары хисабына өч төбәк инжиниринг үзәге булдырылган – “КАИ-Лазер”, “Эйдос” үзәге базасында медицина фәне үзәге һәм химия технологияләре өлкәсендәге үзәк.

Ул билгеләп үткәнчә, “КИП-Мастер” сәнәгать паркында мәйданы 66 мең кв.м булган производство һәм склад, офис мәйданнары төзелгән, анда 18 резидент урнашкан, аларның өчесе продукциясен инде чыгара, якын арада тагын алтысы үз производстволарын башлап җибәрергә ниятли. “380 ләп яңа эш урыны булдырылыр дип планлаштырабыз”, - диде Мидхәт Шаһиәхмәтов.

Аның сүзләренә караганда, быел Татарстанда инновацион инфраструктураның берничә яңа объектын булдыру планлаштырыла. Аларның берсе – ТР биотехнологияләре инжинирингы үзәге. “Проектның максаты, РФ һәм ТР ресурлар базасыннан файдалану өчен, азык-төлек продуктлары, азык һәм азык өстәмәләрен җитештерү өлкәсендә инфраструктура белән тәэмин итүдән гыйбарәт”, - дип белдерде министр.

Аның әйтүенчә, предприятиеләрне прототиплау һәм робототехника үзәге булдырылачак. “Бу бүгенге көндә ил күләмендә һәм безнең республикада актив алып барыла торган эш. Ул компьютерда проектлаудан, роботлаштырылган комплекс һәм җиһаз прототипларын җитештерүдән башлап, Кама инновацион территориаль производство кластеры предприятиеләрен технологик җиһазлауга кадәр, тулы производство системасын эшләү юнәлешендә махсуслашкан инженер-производство комплексы булачак”, - диде. Үзәк ике махсуслашкан лабораторияне үз эченә ала. Яр Чаллыда IT-парк кысаларында гамәлдә булган беренче лабораториядә роботлаштырылган комплексларны гамәлгә кертү буенча хезмәт күрсәтелә. А. Туполев исемендәге Казан илкүләм тикшеренү техник университеты – КАИ базасындагы икенче лаборатория, төп функцияләрдән тыш, сәнәгать технологияләрен эшләүне тәэмин итә.

Мидхәт Шаһиәхмәтов хәбәр иткәнчә, быел шулай ук Цифрлы технологияләр үзәген төзү ниятләнә. Проект төгәл коюның цифрлы технологияләре өлкәсендә нәтиҗәле төстә гамәлдә булуны күздә тота.

Моннан тыш, кече һәм урта эшмәкәрлек субъектларының кластер үсешенең Кама үзәген булдыру ниятләнә.

“Химград” технополисы базасында заманча производство комплексы төзеләчәк. Мәйданы 10 мең кв.м булачак бу комплекста 12 гә якын яңа резидентның урнашуы ниятләнә. Бу 100 гә якын югары җитештерүчәнлекле эш урыны булдырырга һәм хосусый инвестицияләр җәлеп итәргә мөмкинлек бирәчәк.

Яңа объектлардан тыш, эшмәкәрлеккә ярдәм үзәге, экспортка йөз тоткан предприятиеләрне координацияләү үзәге, бизнес-инкубаторлар үз эшен дәвам иттерәчәк.

Мидхәт Шаһиәхмәтов шулай ук “Лизинг-Грант” программасы буенча финанслау күләмнәре турында да бәян итте. Аның әйтүенчә, “Лизинг-Грант” чараларының өчтән бер өлешен муниципаль технопарк резидентлары алачак. “Быел федераль һәм республика бюджетлары хисабына финанслауның гомуми күләме 555 млн сум тәшкил итәчәк”, - дип белдерде ул. Министр искәртеп узганча, “Лизинг-грант” линиясе буенча ярдәм, авыл хуҗалыгы, газ-мотор техникасын сатып алган очракта йөк ташу, производство проектлары кебек өстенлекле юнәлешләр буенча бара. Субсидияләүнең аерым шартларына килгәндә, гаилә һәм терлекчелек фермаларын булдыру буенча проектларны тормышка ашыручы эшмәкәрләргә лизинг килешүе суммасының 70 процентына кадәр өлеше тәтеячәк.

Өстенлекле юнәлешләрнең берсе – муниципаль сәнәгать мәйданчыклары резидентларына ярдәм итү. IT-паркта урнашкан резидентларга, эшмәкәрлек субъектларының җиһаз сатып алуга тотылган чыгымнарын каплау өчен, 186 млн сум күләмендә субсидия юнәлдереләчәк. Кредитлар буенча процентлар түләү өчен тагын 13 млн сум акча каралган.

“Без әлеге чаралар муниципалитетлардагы сәнәгать мәйданнарының кызыклылыгын арттырырга мөмкинлек бирәчәк, бу аларның үсеше өчен өстәмә стимул булачак дип фаразлыйбыз”, - дип аңлатты Мидхәт Шаһиәхмәтов.

Быел акчаның бер өлеше инфраструктура үсешенә дә тотылачак. РФ һәм ТР бюджетларыннан 200 млн сум “Теләче” сәнәгать паркына юнәлдереләчәк. Проект узган елда республика бюджеты акчасына башланган, быел бу паркта инженер инфраструктурасын булдыру буенча эшне дәвам иттерү күздә тотыла.

Министр хәбәр итүенчә, Татарстанда эшмәкәрлек үсешенә ярдәм итү буенча төп чараларга федераль бюджеттан финанслау 1 млрд 829 млн сумга кадәр арттырылган.