Илдар Халиков: “Бүген Пенсия фонды органнары алдында катлаулы бурычлар тора”

2014 нче елда Татарстан предприятиеләре һәм гражданнары тарафыннан мәҗбүри пенсия иминиятенә 85 млрд сум акча күчерелгән, бу планга карата 102 процент дәрәҗәсендә. Мәҗбүри медицина иминиятенә кертелгән акчага килгәндә, ул 17,7 млрд сум тәшкил итә (планнан 103,4 процент дәрәҗәдә). Әлеге мәгълүматларны бүген Россия Пенсия фондының Татарстан Республикасы буенча бүлегенең ТР Премьер-министры Илдар Халиков катнашында узган киңәйтелгән коллегия утырышында бүлек идарәчесе Марсель Имамов җиткерде.

Утырышта шулай ук ТР буенча Баш федераль инспектор Ренат Тимерҗанов, ТР Президентының социаль мәсьәләләр буенча ярдәмчесе Ләйлә Фазлыева, ТР Дәүләт Советының социаль сәясәт буенча комитеты рәисе Светлана Захарова, ТР Муниципаль берәмлекләр советы рәисе Минсәгыйть Шакиров, Пенсия фондының ТР буенча бүлегенең шәһәр-район идарәләре башлыклары катнашты.

Марсель Имамов 2014 нче елгы эшчәнлекнең төп күрсәткечләре буенча хисап тотты. Аның сүзләренә караганда, Татарстанның Пенсия фондына кертелгән акча күләме соңгы 5 ел эчендә 2 тапкыр арткан. Республикада үткән елда пенсионерлар санының да 15 меңгә артуы күзәтелә, шул рәвешле, лаеклы ялда 1 млн 90 мең кеше исәпләнә. Пенсия фонды бүлеге бюджеты чыгымнары былтыр 150 млрд сум булган, 2013 нче елда ул – 149 млн сум. 2014 нче елда Татарстанда картлык буенча пенсиянең уртача күләме 8,3 процентка күтәрелеп, 11 мең сумнан артып киткән. Барлык пенсияләрнең уртача күләме 10 мең 415 сум дәрәҗәсендә.

Илдар Халиков ТР буенча Пенсия бүлеге эшчәнлегенә бәя бирү чыгышында, иң элек, Татарстан Республикасының 2014 нче елны уңышлы тәмамлаганын, барлык планлаштырылган социаль-икътисади үсеш күрсәткечләренең үтәлгәнен искәртеп узды һәм аларның кайберләренә тукталды.

Хөкүмәт башлыгы Пенсия фонды бүлеге тарафыннан социаль бурычларның тулы күләмдә үтәлгәнен ассызыклады. Ул шулай ук министрлык һәм ведомстволар белән җайга салынган хезмәттәшлек алып барылганын, 2014 нче елда, берничә яңа юнәлеш өстендә интенсив төстә эш алып барылу белән беррәттән, эзлекле рәвештә агымдагы бурычлар да хәл ителеп килгәнен билгеләп узды.

Премьер-министр агымдагы елның 1 нче гыйнварыннан пенсияне билгеләүнең яңа тәртибен гамәлгә кертү, гражданнарга пенсия исәпләнүнең яңа формуласын аңлату буенча җитди әзерлек эше алып барылганын, хезмәткәрләрнең әзерлек узуын билгеләде. “Йөкләмә зур булса да, сезнең эш барышыннан канәгатьбез. Төп бурыч – халыкка якынрак булып, уңайлы шартлар тудыра, аларга яңалыкларны аңлаешлы итеп җиткерә белү. Сез моны булдырасыз, Россия төбәкләре арасында алдынгы булуыгыз да юкка гына түгел. Татарстан лидерлык позициясен саклап кала алыр дип өметләнәм”, - диде Илдар Халиков.

Хөкүмәт башлыгы Пенсия фонды алдында бурычлы булган бюджет предприятиеләре мәсьәләсенә тукталып: “Без бу бурычны хәл итүгә ирештек, һәм бу бик яхшы – 60 млн сумга якын бурыч тулысынча түләнгән. Бу эшне алга таба да максатчан төстә дәвам иттерергә кирәк. Бу Финанслар министрлыгының, башка министрлык һәм ведомстволарның да бурычы. Киләчәктә бюджет учреждениеләренең Пенсия фонды алдындагы бурычлары төшенчәсе тәҗрибәдән бөтенләй юкка чыгар дип ышанам. Министрлыклар да бу мәсьәләне контрольдә тотарга тиеш”, - дип ассызыклады Илдар Халиков.

Премьер-министр фикеренчә, иминият взносларын җыюның нәтиҗәлелеге артуга административ каршылыкларны киметү дә йогынты ясый.

Пенсия бүлеге тарафыннан күрсәтелә торган электрон хезмәтләрнең күләмен 70 процентка җиткерүне Илдар Халиков мактап телгә алды. Хөкүмәт җитәкчесе әйтүенчә, елдан-ел электрон сервистан файдалануда уңайлы шартлар тудыру халыкның яңа мәгълүмати системаларны аңлап кабул итүендә чагылыш таба. “Хәзер беркемне мәҗбүр итәргә кирәкми. Татарстанлылар электрон хезмәтләрдән файдалана белмәс, дигән пессимистик фаразлар расланмады, пенсионерлар компьютер белеменә төшенде”, - дип билгеләп узды Илдар Халиков. Аның әйтүенчә, бу бик четерекле эш, бу юнәлештәге эш киләчәктә дә финансланачак. Ул хәбәр иткәнчә, “Интернет-долголетие” программасы буенча 22 мең граждан әзерлек узган, 2014 нче елда 5 меңнән артык кеше укырга җибәрелгән.

“Бүген пенсия фонды органнары алдында яңа федераль законнарны үтәү, пенсия хокуклары үтәлешен тәэмин итү буенча зур җаваплылык ята. Безнең гражданнар пенсия белән тәэминат эшчәнлегендә тоткарлыклар, өзеклекләр, хилафлыклар тоймас дип ышанам. 2015 нче ел катлаулы ел булуына карамастан, бурычлар уңышлы хәл ителер, Пенсия фонды эшечәнлеге алга таба да тотрыклы булыр, халыкның көнкүреш дәрәҗәсен саклап кала алырбыз дип ышанам”, - дигән теләктә калды Илдар Халиков.

Коллегия азагында Премьер-министр ведомство алдынгыларына дәүләт бүләкләрен тапшырды.