Илдар Халиков Чехия Республикасы белән хезмәттәшлек турында: Безнең хезмәттәшлекнең яхшы дәвам итүе әһәмиятле

Татарстан Республикасы Премьер-министры Илдар Халиков бүген Чехия Республикасы сәнәгать һәм сәүдә министры урынбасары Иржи Колиба белән очрашты.
Очрашу ТР Хөкүмәте йортында узды.

Искә төшерәбез, Иржи Колиба җитәкчелегендә Чехия делегациясе Казанга Чехия Республикасы белән Татарстан Республикасы арасында сәүдә-икътисадый хезмәттәшлекне координацияләү буенча эшче төркемнең чираттагы утырышында катнашу өчен килде.

Илдар Халиков кунакларны сәламләп, мондый очрашулар традициягә әйләнде, дип билгеләде.

Илдар Халиков эшче төркем утырышы һәм Чехия делегациясенең Татарстанга килүе ике як өчен дә нәтиҗәле узачагына ышаныч белдерде.
“Соңгы вакытта безнең Чехия Республикасы белән җитештерү, мәгариф һәм башка өлкәләрдә очрашулар күп булды, - диде ТР Премьер-министры. –Ышанам, аларның 2015-2016 елларда нәтиҗәсе күренә башлаячак”.

Илдар Халиков шулай ук Чехия Республикасы сәнәгать һәм сәүдә министры урынбасарына Чехия делегациясенең Казанга килүе, республика өчен мөһим вакыйга белән туры килүен белдерде. Иртәгә, 2015 елның 9 июнендә, Иннополис инновацион шәһәренең тантаналы ачылышы узачак. Бу чарага Россия Хөкүмәте рәисе Дмитрий Медведев киләчәк.

Илдар Халиков Чехия хезмәттәшләрен Иннополисның тантаналы ачылышында катнашырга чакырды. Ул бу проект, шулай ук Татарстан территориясендә бүген гамәлгә ашырыла торган башка кызыклы инновацион проектлар белән таныштырды.

Моннан тыш, Илдар Халиков белдергәнчә, бүген Казан белән Прага арасында туры авиарейсларны яңадан башлап җибәрү турында сүз бара. Бу үз чиратында туристларның артуына ярдәм итәчәк, диде ул.