Болгар һәм Зөя шәһәрләрен торгызуга федераль бюджеттан 400 млн. сум акча килгән

Бүген ТР Дәүләт Советының Икътисад, инвестицияләр һәм эшкуарлык комитеты әгъзалары “2010 елга Татарстан Республикасы бюджеты турында” ТР Законына үзгәрешләр кертү турында” закон проектын беренче укылышта карады. Закон проектын депутатларга ТР Финанслар министры Радик Гайзатуллин тәкъдим итте.
Министр сүзләренә караганда, кертелә торган үзгәрешләр агымдагы елның беренче яртыеллыгында федераль казнадан килгән акчалар һәм Татарстанның үз керемнәре арту белән бәйле. Шулай итеп, гомуми керем
22, 8 млрд. сум тәшкил итә.
Аерым алганда, республикага федераль бюджеттан 13,6 млрд. сум акча килгән. Салымга бәйле керемнәр 8,8 млрд. сум күләмендә җыелган. Бигрәк тә республиканың нефтехимия комплексы зур табыш китергән.
Федераль казнадан акча билгеле бер максатларда куллану өчен җибәрелә. Аерым алганда, аны сугыш ветераннарын һәм аларның гаилә әгъзаларын торак белән тәэмин итүгә (4,3 млрд. сум), халыкның мәшгульлеген тәэмин итүгә, кече эшмәкәрлеккә дәүләт ярдәменә, Болгар һәм Зөя шәһәрләрен торгызуга (400 млн. сум), Универсиада объектларын төзү һәм төзекләндерүгә, яшь гаиләләрне торак белән тәэмин итүгә тоту көтелә. Шулай ук юл төзелешенә һәм корылык белән бәйле рәвештә кредитлар бирелә.
Радик Гайзатуллин хәбәр иткәнчә, үзгәрешләрне исәпкә алып, Татарстан Республикасы бюджетының чыгым өлешен – 23,3 млрд. сумга, керем өлешен 22,8 млрд. сумга арттырырга тәкъдим ителә. Шулай итеп, бюджет кытлыгы 12 млрд. 800 млн. сум тәшкил итә.
Министр республика бюджетын тулысынча баланслы дип саный. Аның сүзләренә караганда, бюджет кытлыгы өстәмә керемнәр, бюджет кредитлары хисабына каплана.
Икътисад, инвестицияләр һәм эшкуарлык комитеты рәисе Марат Галиев фикеренчә, республика бюджетының тотрыклылыгы арта бара.