Табышка салым яхшы җыелу аркасында, ТРның 2011 ел бюджетына үзгәрешләр кертелә

Бүген ТР Дәүләт Советының Бюджет, салымнар һәм финанслар комитеты 2011 елдагы беренче утырышын уздырды. Утырышны комитет рәисе Морат Гаделшин алып барды.
Депутатларны “Татарстан Республикасының 2011 елга һәм 2012 һәм 2013 еллар план чорына бюджеты турында” ТР Законына үзгәрешләр кертү хакында” закон проекты белән ТР Финанс министры Радик Гайзатуллин таныштырды. Министр хәбәр иткәнчә, агымдагы ел бюджетына үзгәрешләр гомумикътисади вәзгыять һәм федераль үзәкнең Россия Федерациясе субъектларына куелган таләпләре белән бәйле рәвештә кертелә.
Үзгәрешләр кертү белән бәйле сәбәпләр арасында 2010 ел ахырында табышка салым түләүчеләрнең икътисади яктан үсеш кичерүе, 2010 ел йомгаклары буенча бөтен республика буенча табышка салымны яңадан исәпләү нәтиҗәләре уңай булыр дип фаразлануы да бар. Шулай ук нефть һәм нефть продуктларына бәяләр үсү; 2013 елда Казанда узачак Универсиадага әзерлек чараларын, “Мәгариф” һәм “Сәламәтлек” илкүләм өстенлекле проектларын республика бюджетыннан федераль үзәк белән бергәләп финанслау; Татарстан Республикасының инвестицияләр җәлеп итүчәнлеген һәм кредитлар белән бәйле рейтингын күтәрү өчен, бюджетның үсеш өлешен арттыру зарурлыгы да карала.
Шушы факторларны исәпкә алып, әлеге закон проекты белән, табышка салым буенча фаразны 10 млрд. сумга арттырырга тәкъдим ителә. Шулай итеп, 2011 елда табышка салымның гомуми күләме 35 млрд. сум булыр дип көтелә. Аның 21 млрд. сумы – зур күләмдә салым түләүчеләрдән, 14 млрд. сумы калган салым түләүчеләрдән керер дип планлаштырыла.
Шулай итеп, Татарстан Республикасының 2011 елга бюджет чыгымнарын да 10 млрд. сумга арттырырга киңәш ителә. Алар федераль максатчан программаларны һәм илкүләм өстенлекле проектларны федераль үзәк белән бергәләп финанслауга җибәреләчәк. Аерым алганда, Татарстан Республикасының Капиталь салулар программасын финанслауга – 5 млрд.сум, ТРның гомуми кулланыштагы юлларында эшләр программасын финанслауга 5 млрд. сум күләмендә акча җибәрү көтелә. Республиканың 2011 елга бюджет күрсәткечләре баланслы дип санала.
Законга кертелә торган үзгәрешләр нәтиҗәсендә, бюджетның керем өлешен – 102 658 222,4 мең сум, чыгым өлешен 113 446 714,8 мең сум, дефицитны 10 788 492,4 мең сум күләмендә расларга тәкъдим ителә.
Бүген депутатлар шулай ук федераль закон проектларын, РФ субъектлары дәүләт хакимиятенең закон чыгару (вәкиллекле) органнары закон чыгару инициативаларын карады. Комитетның 2011 елга һәм беренче кварталга төзелгән якынча эш планын раслады.