Икътисадый үсеш министрлыгы РФдә февральдә еллык инфляцияне 2,2-2,3% дәрәҗәсендә көтә
Икътисадый үсеш министрлыгы РФдә 2018 елның февралендә айлык инфляцияне 0,2-0,3%, еллыгын 2,2-2,3% дәрәҗәсендә көтә. Бу хакта министрлык материаллары сөйли.
“Россиянең Икътисадый үсеш министрлыгы бәяләве буенча айлык инфляция февральдә 0,2-0,3%, еллык инфляция 2,2-2,3% тәшкил итәчәк”, - дип искәртелә материалларда. Гыйнварда РФдә инфляция тагын бер тапкыр тарихи минимумны яңартты – куллану бәяләре үсеше 2,2% кадәр акрынайды (декабрьдә 2,5% иде). Бу Икътисадый үсеш министрлыгы бәяләвеннән (2,3-2,5%) дә түбәнрәк булды.
Идарә тармагы беренче кварталның ахырына инфляция кызуланачак һәм июньдә 2% кадәр акрынаячак дип исәпли. Шул ук вакытта инфляциянең акрынаюы вакытлыча түгел һәм аның шарты вакытлыча факторлар белән генә билгеләнмәгән.
“Икътисадый үсеш министрлыгы бәяләвенчә, инфляциянең күзәтелгән акрынаюы вакытлыча түгел. Беренче кварталның ахырына кызуланганнан соң инфляция июньдә елга ел 2,0% тирәсе дәрәҗәсенә кадәр төшәчәк”, - дип искәртәләр Икътисадый үсеш министрлыгында.
Шулай ук министрлык нефтькә агымдагы бәяләр сакланган очракта, 2018 елда тулаем эчке продуктның 1,2%та РФ федераль бюджетының профицитын көтә. “2018 елда нефтькә бәяләр агымдагы дәрәҗәдә сакланган очракта, бюджет профициты тулаем эчке продуктның 1,2% тәшкил итәргә мөмкин, шул ук вакытта Илкүләм иминлек фондына 3,5трлн сум (агымдагы курс буенча якынча $60 млрд) юнәлтелергә мөмкин”, - дип искәртәләр министрлыкта.