РФ Финанс министрлыгы Министрлар Кабинетына интернетта алкогольне сату турында закон проектын кертте

Россия Финанс министрлыгы Хөкүмәткә Челтәрдә алкогольне сатуны көйли торган закон проектын керткән. Бу хакта Салым һәм таможня сәясәте департаменты башлыгы Алексей Сазанов хәбәр итте.

Онлайн-сәүдә киләсе елдан башлап этаплап кертеләчәк, чөнки мәгълүмати инфраструктурага тест үткәрү өчен вакыт кирәк булачак дип аңлатты ул.

“2019 елның 1 гыйнварыннан беренче этапта сакланган географик күрсәтмәле һәм сакланган килеп чыгу урыны атамалы тыныч һәм чемердәп тора торган шәрабларны, шулай ук сыра һәм сыра эчемлеген, сидр, пуаре һәм бал балын мондый шәрабларны җитештерүгә лицензиясе булган затларга, күмәртәләп сату лицензиясе булган һәм сыра җитештерүчеләргә дистанцияле сатуны эшләтеп җибәрү тәкъдим ителә”, - дип цитата ясый ТАСС Финанс министрлыгы вәкиле сүзләрен.

Шуннан соң 2020 елның 1 гыйнварыннан шулай ук алкогольне күмәртәләп сатуга лицензиясе булган затлар бөтен алкогольне интернет аша сата алачак. Ниһаять, 2022 елдан барлык базарда катнашуыларга алкогольнең барлык төрләрен ваклап сатарга рөхсәт итәчәкләр. Алкогольне бары egais.ru зонасындагы сайтлар аша гына сатарга мөмкин булачак.

Шулай итеп, алкогольне ерактан ваклап сатуга яңа лицензия төре барлыкка киләчәк. Шәраб хәзерләү продукциясен чыгаручы авыл хуҗалыгы җитештерүчеләре өчен шулай ук интернет аша ваклап сатуга лицензия кертәчәкләр.

Моннан тыш, Челтәрдә сыра саткан оешмаларны һәм шәхси эшмәкәрләрне туплаган махсус исемлек булдырылачак. Лизенцияләрне бирү һәм исемлеккә кертү белән Россия алкоголь базарын җайга салу федераль хезмәте шөгыльләнәчәк.

Хәзер алкогольне интернет аша сату рөхсәт ителми. Россия алкоголь базарын җайга салу федераль хезмәте мондый сәүдәне легаль алып бармаган сайтларны ачыклый. "Российская газета" хәбәр итүенчә, 16 июньнән идарә тармагы мондый сайтларны ябу турында карарлар кабул итү функциясен алган. Ай дәвамында алкоголь саткан 670 ресурс ачыкланган