Татарстанда 2019 елда төзелеш һәм капиталь ремонт өлкәсендә 40 республика программасын гамәлгә ашыру планлаштырыла
Татарстан Республикасында 2019 елда төзелеш һәм капиталь ремонт өлкәсендә 40 республика программасын гамәлгә ашыру планлаштырыла – бу 38 озак сроклы программа һәм ике быелгы программа.
Бүген бу хакта ТР төзелеш, архитектура һәм ТКХ минстры Ирек Фәйзуллин ТР Хөкүмәте йортында узган республика киңәшмәсендә хәбәр итте.
Киңәшмәне барлык муниципаль районнар белән Татарстан Республикасы Президенты Рөстәм Миңнеханов видеоконференцэлемтә режимында уздырды. Киңәшмәдә ТР Премьер-министры Алексей Песошин да катнашты.
Ирек Фәйзуллин хәбәр иткәнчә, 40 программадан бүгенгә 29ы ТР Кабинетлар Министрлыгы күрсәтмәсе белән раслауны таләп итә. Хәзергә 15 программа расланган, 7 се ТР Министрлар Кабинетына кертелгән, 8 программа буенча исемлекләр формалаштырыла һәм килештерелә.
ТР Төзелеш министрлыгы башлыгы искәрткәнчә, 2018 ел йомгаклары буенча республикада 2 млн. 409,9 мең кв. м. торак файдалануга тапшырылган (еллык биремнең 100,3 %ы).
Киңәшмәдә Татарстан Республикасы финанс министрының беренче урынбасары – Казначылык департаменты директоры Марат Фәйзрахманов та булды.