Рөстәм Миңнеханов: Бүген керем базасын арттырырга, яңа җитештерүләр һәм яңа эш урыннары булдырырга кирәк

Татарстан Республикасында сәнәгать җитештерүе темпларының реаль рәвештә акрынаю күзәтелә, 2013 елны без 1,5 процентка үсеш белән тәмамлыйбыз. Бүген Татарстан Республикасы Президенты Р.Н. Миңнеханов Татарстан Республикасы Министрлар Кабинеты утырышында шул хакта хәбәр итте.
Утырышта өч мәсьәлә каралды -2014 елга һәм 2015 - 2016 еллар план чорына Татарстан Республикасының социаль-икътисадый үсешен фаразлауның төп параметрлары; 2014 елга, 2015 һәм 2016 еллар план чорына Татарстан Республикасы берләштерелгән бюджеты фаразы; 2014 елга, 2015 һәм 2016 еллар план чорына Татарстан Республикасы Территориаль мәҗбүри медицина иминияте фонды бюджеты проекты.
Утырышта катнашучыларга мөрәҗәгать итеп, Татарстан Президенты гамәлдәге икътисадый вәзгыятьне объектив бәяләргә өндәде. Аның сүзләренчә, бүген нефтькә бәяләр бөтендөнья икътисадының торышын чагылдыра. Бөтендөнья икътисады үсеше темпларының кимүе республикада да чагыла, чөнки сәнәгать продукциясе күләменең 50%ын без экспортка чыгарабыз, диде Рөстәм Миңнеханов.
Аның сүзләренчә, бүген керем базасын арттырырга, яңа җитештерүләр һәм яңа эш урыннары булдырырга кирәк.
“Кече һәм урта бизнес өлеше артмау, хәтта беркадәр кимү тенденциясе – борчый торгант факт, - диде Рөстәм Миңнеханов. – Димәк, барысын да җиренә җиткерә алмыйбыз әле. Без эре мәйданчыклар, индустриаль зоналар белән генә шөгыльләнергә түгел, без эшкуарлык өчен дә мохит тудырырга, шул исәптән шәхси хуҗалыкларны да үстерергә тиеш. Кешеләр эшли алсын, аларның керемнәре артсын”.
Тулаем алганда, Рөстәм Миңнеханов республика икътисадындагы вәзгыятькә тотрыклы дип бәя бирде. “Әлегә вәзгыять тотрыклы, әмма безнең фаразлаулар акланмый. Безнең бурыч - 2016 елга ҖРПны 2 трлн. сумга кадәр арттырырга – мондый вәзгыятьтә аны үтәү катлаулы булачак”, - диде ул.
Татарстан Президенты сүзләренчә, бүген бюджет консерватив булырга һәм агымдагы вәзгыять чыгымнарын каплап барырга тиеш. Акчаларны рациональ тотарга кирәк, диде ул, аларны инвестицияләргә һәм инновацияләргә тотарга кирәк.
Рөстәм Миңнеханов Татарстан Республикасы Төзелеш, архитектура һәм ТКХ министрлыгын, шулай ук Татарстан Республикасы Транспорт һәм юллар хуҗалыгы министрлыгын кайбер проектларын яңадан карап чыгарга һәм бюджет объектлары төзелешенең кыйбатлануыннан котылырга кушты.
“Уйланылмаган, төзелеш барышында хаклары ике мәртәбә арта торган проектларны яңадан карап чыгарга кирәк, - диде Рөстәм Миңнеханов. Билгеле бер стандартлар кабул итәргә кирәк, без матурны, әмма җитәрлек дәрәҗәдә функциональ булмаганны күп төзибез. Кабат куллану проектларыннан файдаланырга кирәк”.
Татарстан Республикасы Президенты шулай ук спорт инфраструктурасы объектларына чыгымнарны оптимальләштерергә кушты.
Моннан тыш, бүген, бик кирәк булмаса, яңа объектлар төзү белән мавыкмаска киңәш итте, ә социаль инфраструктураны – мәктәпләрне, училищеларны, сәламәтлек саклау объектларын – булганнарын тәртикә китерергә кирәк, дип ассызыклады ул.
Юллар салу тармагына килгәндә исә, Рөстәм Миңнеханов фикеренчә, бүген хакы бик зур булган юллар салына. Кайбер җирдә безнең бөтенләй юллар юк, диде ул, ә без салган юллар бик кыйбатка төшә.
Рөстәм Миңнеханов шулай ук юллар салу өчен китерелә торган материаллар – вак таш, ком һәм башкалар кыйбат чыга. Аның сүзләренчә, бүген кайберәүләрнең шунда акча эшләп калуы, азаккы бәяләрнең һәр юл полотносы өчен артып китүе сер түгел.