Республикада алгарышлы үсеш территорияләре резидентларының мондый территорияләрне үстерү кысаларында төзелгән килешү шартларын үтәвен тикшерү эше оештырылган
Хәзерге вакытта республикада алгарышлы үсеш территорияләре биш моношәһәрдә эшләп килә: Яр Чаллыда, Түбән Камада, Чистайда, Яшел Үзәндә һәм Менделеевскта. Законнар нигезендә алгарышлы үсеш территорияләре резидентларына салым салуның ташламалы режимы билгеләнгән.
Контрольне гамәлгә ашыру өчен махсус төзелгән комиссия составына Татарстан Республикасы Икътисад министрлыгы, Татарстан Республикасы Финанс министрлыгы, Татарстан Республикасы Инвестицион үсеш агентлыгы, профильле министрлыклар, шулай ук муниципаль берәмлекләр башкарма комитетларының һәм салым органнарының структур бүлекчәләре вәкилләре керде.
Комиссия әгъзалары проектларын гамәлгә ашыру урыны буенча резидентлар белән күчмә чаралар үткәрә. Алар барышында җитештерү шартлары, компанияләрнең бизнес-планнарында күрсәтелгән җитештерү биналары һәм җиһазлары булу, шулай ук салым законнары һәм башка норматив хокукый актлар таләпләрен үтәү предметына компанияләрнең беренчел документлары һәм хисап мәгълүматлары тикшерелә.
2025 елның май-ноябрь айларында комиссия әгъзалары барлык биш моношәһәрдә резидентларның төзелгән килешүләр шартларын үтәвен тикшерделәр.
Киләчәктә күчмә чараларны даими нигездә уздыру планлаштырыла.