Россия Герое Рәсим Баксиков Татарстан Республикасы Финанс министрлыгында стажировка үтте
Махсус хәрби операциядә катнашучылар һәм ветераннар өчен «Геройлар вакыты» үсеш программасында уку кысаларында Рәсим Баксиков Татарстан Республикасы Финанс министрлыгында Татарстан Республикасы Финанс министры Марат Фәйзрахманов белән рәсми очрашты.
Очрашу вакытында Татарстан финанс министры Рәсим Баксиковның республиканың бюджет һәм финанс системасындагы процессларны тирәнтен өйрәнергә теләвен билгеләп узды.
«Министрлыкта күрешеп, ике якның да үзара кызыксынуын уята торган финанс системасының төп мәсьәләләре, аерым алганда, социаль яклау чараларын тәэмин итү һәм халыкны эш белән тәэмин итүгә ярдәм итү өлкәсендә дәүләт сәясәте хакында җентекләп фикер алышу мөмкинлегенә шат булдым», - дип билгеләп үтте Марат Фәйзрахманов.
Марат Фәйзрахманов сүзләренчә, социаль өлкә мәсьәләләре дәүләт эшчәнлегендә үзәк урынны алып тора, чөнки гражданнарның лаеклы тормыш дәрәҗәсенә шартлар тудыруга булышлык итә. 2025 елда гына Татарстан Республикасы берләштерелгән бюджетының социаль өлкәгә чыгымнары 381,6 млрд сум тәшкил иткән.
Стажировка вакытында Рәсим Баксиков Татарстан Республикасы Финанс министрлыгы бүлекләре эше белән танышты, бюджетның керем һәм чыгым өлешләрен формалаштыру мәсьәләләрен, шулай ук икътисад һәм социаль-мәдәни өлкә тармакларын финанслау үзенчәлекләрен өйрәнде.
"Финанс министрлыгы эшчәнлегенең төп юнәлешләре турында фикер алыштык. Татарстан Республикасы бюджеты мисалында аны формалаштыру принципларын һәм бюджет чараларын бүлү механизмын җентекләп тикшердек. Бик күп файдалы мәгълүмат һәм куелган сорауларга аңлаешлы җаваплар ала алдым. Нәтиҗәле хезмәттәшлегебез дәвам итәр дип өметләнәм", - дип йомгаклады стажировка нәтиҗәләре буенча Рәсим Баксиков.
Стажировка үткәрүне Татарстан Республикасы финанс министрының беренче урынбасары – Татарстан Республикасы Финанс министрлыгының Казначылык департаменты директоры Рөстәм Аюкасов җитәкләде.
“Геройлар вакыты” федераль программасы Россия Президенты Владимир Путин йөкләмәсе белән хәрби хәрәкәтләр ветераннарын реабилитацияләүгә, укытуга һәм эшкә урнаштыруга юнәлдерелгән. 2025 елда Россия төбәкләренең күпчелеге “Геройлар вакыты” кадрлар проектының үз үрнәкләрен гамәлгә ашыра башлады. Татарстан Республикасында ул “Батырлар. Татарстан Геройлары” дип атала.