Татарстан Республикасы Финанс министрлыгы

Илдар Халиков “Сочи-2014” халыкара инвестиция форумының пленар утырышында катнашты

2014 елның 20 сентябре, шимбә

Бүген Татарстан Премьер-министры илдар Халиков Сочида халыкара инвестиция форумының пленар утырышында катнашты. Утырышта Россия Федерациясе Хөкүмәте рәисе Дмитрий Медведев чыгыш ясады.

Үзенең чыгышында Дмитрий Медведев беренче чиратта көнбатыш партнерларының соңгы айларда Россиягә карата нигезсез катгый сәясәтен билгеләп үтте.

“Санкцияләргә карамастан, көнбатыш партнерлары өчен Россиягә ишекләр ябык түгел”,- дип белдерде Д.Медведев.

Ул шулай ук Россиянең Азия илләре белән элемтәсен үстерү буенча яңа стратегиясен Европага үч итеп кабул итәргә ярамый, диде. “Бу вакыйгалар үсешенең табигый барышы, һәм икътисади үсешнең үзгәрүчән шартларына уйланылган җавап”,- дип аңлатты РФ Хөкүмәте башлыгы.

Аның фикеренчә, Россия санкция шартларында да, заманча базар икътисадын үстереп, үз курсы белән барырга тиеш.

Дмитрий Медведев ассызыклаганча, санкцияләр белән килеп чыккан хәлне, Россиянең азык-төлек, фармацевтика сәнәгатьләре, авиация һәм суднолар төзелеше предприятиеләре, ракета-космос сәнәгате, радиоэлектроника комплексы, автомобиль төзелеше кебек икътисади секторлары үсешенә яңа мөмкинлекләр бирү өчен кулланырга кирәк.

РФ Хөкүмәте сентябрь ахырына кадәр сәнәгать һәм агро-сәнәгать комплексында импортны алыштыруга ярдәм итү буенча ике еллык планны раслаячак, дип искә төшерде.

БАРЛЫК ЯҢАЛЫКЛАРНЫ УКУ