ЯҢАЛЫКЛАР

Кичә «Татнефтехиминвест-холдинг»та ТР нефть, газ һәм химия комплексында 2014 ел нәтиҗәләрен һәм чит илләрдән кертелә торган товарларны алмаштырырлык продукцияне үзебездә җитештерү мәсьәләсен карадылар. Татарстан Президенты Рөстәм Миңнеханов утырышта катнашучылар игътибарын РФ Хөкүмәтенең кризиска каршы программасына актив кушылуга һәм Татарстан предприятиеләреннән тәкъдимнәр әзерләүгә юнәлтте. Ул төп бурыч итеп базарны саклау һәм чит илгә товар чыгаруны арттыруны атады. Аның сүзләренә караганда, машина төзелеше һәм кече бизнес авыр хәлдә. Процент ставкалары югары булган банк кредитларын алу - проблемалы мәсьәлә. ТР Президенты тармак министрлыкларына кризиска каршы программа һәм читтән кертелә торган товарларны алмаштырырлык продукция җитештерү буенча чаралар кысаларында ташламалар алу өчен перспективалы проектларны анализлауны йөкләде.

Соңгы елларда Татарстан мәдәнияты югары темплар белән үсте, ләкин бүген яңа зур бурычлар куярга кирәк. Бу хакта Татарстан Республикасы Президенты Рөстәм Миңнеханов бүген яңа гына төзекләндерелгән Качалов исемендәге Казан академия зур драма театры бинасында беренче мәртәбә узган республиканың Мәдәният министрлыгының нәтиҗәләр чыгару коллегиясендә белдерде.

Бүген Татарстан Республикасы Президенты Рөстәм Миңнеханов 2015 елгы Су спорт төрләре буенча дөнья чемпионатының республика оештыру комитеты утырышын уздырды. Утырышта шулай ук Татарстан Республикасы Премьер-министры Илдар Халиков, республика министрлыклары һәм ведомстволары җитәкчеләре катнашты.

Утырышны ачып, Татарстан Президенты искәрткәнчә, дөнья чемпионаты башланганчы 178 көн калды. «Дөнья чемпионатының ярышу һәм күнекмәләр өчен бөтен объектлары да билгеләнде, һәм алар бөтенесе дә 10 июльгә хәтле әзер булырга тиеш», - дип белдерде Рөстәм Миңнеханов.

Бүген Давоска эшлекле сәфәре һәм Бөтендөнья икътисадый форумында катнашу кысаларында Татарстан Республикасы Президенты Рөстәм Миңнеханов эре компанияләр җитәкчеләре белән очрашты. Чараларда шулай ук “Татнефть” генераль директоры Наил Маганов катнашты.

Иртән Рөстәм Миңнеханов Руанда Президенты Поль Кагаме һәм Великобританиянең экс-премьеры Тони Блэр катнашындагы эшлекле иртәнге ашта булды. Аннан Татарстан Республикасы Президенты Cisco компаниясенең Европа, Якын Көнчыгыш, Африкада, Россиядә һәм БДБ илләредә сатулар буенча директоры Крис Дедикот белән очрашты. Рөстәм Миңнеханов Татарстанның дөньядагы алдынгы IT-компанияләренең берсе белән дәвамлы һәм уңай хезмәттәшлек итү тәҗрибәсен билгеләп үтте. Ул Крис Дедикотка “Иннополис” проектын гамәлгә ашыру барышы турында хәбәр итте һәм Cisco компаниясен Татарстанда төзелеп килүче IT-шәһәргә чакырды.

Бүген, Швейцариянең Давос шәһәренә эш визитының өченче көнендә, Татарстан Республикасы Президенты Рөстәм Миңнеханов Бөтендөнья икътисадый форумының ике сессиясендә катнашты һәм Казахстанның Икътисадый хезмәттәшлек һәм үсеш оешмасы белән хезмәттәшлек итү ил программасы турындагы Меморандумны имзалау тантанасында катнашты.

“Россиянең яңа икътисадый чынбарлыгы” сессиясендә Рөстәм Миңнеханов форумның оештыру комитеты чакыруы буенча булды. Сессия спикерлары арасында Россия туры инвестицияләр фонды генераль директоры Кирилл Дмитриев һәм Ernst&Young компаниясе рәисе Марк Вейнбергер бар иде.

Бүген көннең икенче яртысында Татарстан Республикасы Президенты Рөстәм Миңнеханов Швейцариянең Давос шәһәрендә Бөтендөнья икътисадый форумының ике сессиясендә катнашты.

«Энергитиканың геоикътисады» сессиясендә катнашучылар геосәясәттәге үзгәрешләренең энергетика базарларына йогынтысы буенча фикер алыштылар. Сессия спикерлары арасында Россия Федерациясе вице-премьеры Аркадий Дворкович та чыгыш ясады. Ул белдергәнчә, нефтькә бәяләр түбән булганда да, нәтиҗәлелекне арттырган очракта, табыш алырга мөмкин, Россия шул юнәлештә хәрәкәт итә.

Бүген Татарстан Республикасы Президенты Рөстәм Миңнеханов Сингапурның Olam International Ltd компаниясенең баш вице-президенты Радж Вардхан һәм вице-президены Сумант Кумар Де белән очрашты. Чарада шулай ук Татарстан Республикасы вице-премьеры – авыл хуҗалыгы һәм азык-төлек министры Марат Әхмәтов, ТР Президентының халыкара мәсьәләләр буенча ярдәмчесе Радик Гыйматдинов катнаштылар.