ЯҢАЛЫКЛАР

Бүген халыкны Дәүләт идарәсе органнарында кабул итүнең бердәм көне кысаларында Татарстан Республикасы Финанс министрлыгы җитәкчелеге Мендеевск шәһәрендә халык сорауларына җавап бирде.

Бүген ТР Хөкүмәте йортында үткәрелгән республиканың коррупциягә каршы тору буенча Советы утырышында ТР Президенты Рөстәм Миңнеханов, миңа оят, чөнки урыннарда сезнең гамәлләр дәүләт хакимияте гамәле итеп кабул ителә, димәк, бу безнең барыбыз өчен дә зур "минус", диде.

Республика башлыгын оялтырлык фактлар исә ТР Президентының коррупциягә каршы сәясәт мәсьәләләре идарәсе җитәкчесе Марс Бәдретдиновның Татарстанда коррупциягә каршы тору буенча эш оештырылышы, бу исәптән шушы юнәлештә эшчәнлек алып бара торган республика эксперт төркеменең Әгерҗе белән Нурлат районнарына барып тикшерү нәтиҗәләре турындагы чыгышында яңгырады.

AirLiquide технополисы планнарында - “Алабуга” МИЗ резидентларына, Татарстанның нефть химиясе комплексы компанияләре, “Химград” технополисы, медицина учреждениеләре резидентларына техник газ җибәреп тору. Бүген бу хакта Директорлар советы рәисе – AirLiquide компанияләр төркеме Президенты Бенуа Потье һәм ТР Президенты Рөстәм Миңнехановның очрашуында сүз барды.

Татарстан башлыгы AirLiquide компаниясенең республикада уңышлы эшчәнлеге турында искәртте – компания 2008 нче елда үз өстенә алган бурычларны үтәгән, һәм хәзер "Алабуга” МИЗда техник газларны җитештерү буенча завод эшли. Рөстәм Миңнеханов сүзләренчә, мондый заводның эшләве потенциаль резидентлар өчен махсус икътисади зонаның конкурентлы өстенлеге булып тора. “Без МИЗны актив үстерергә планлаштырабыз, һәм мин техник газга ихтыяҗ үсәчәк, дип уйлыйм”, - дип белдерде Р.Миңнеханов.

Икътисад сәясәте, инновацион үсеш һәм касәбчелек буенча Дәүләт Думасы комитеты 2013-2015 елларга бюджет  проектын хуплады

Татарстан Республикасы Финанс министрлыгында агымдагы елның гыйнвар-сентябрь айларында республиканың җирле бюджет үтәлеше һәм 2012 елның октябрендә көтелүче үтәлеше буенча муниципаль берәмлекләрнең финанс органнары җитәкчеләре белән киңәшмәләр узды.

Бүген ТР Премьер-министры Илдар Халиков Кытайның Guangdong Zhenrong Energy компаниясе вәкилләре белән очрашты. Очрашуда шулай ук ТР Инвестицон үсеш агентлыгы җитәкчесе Линар Якупов, ТР сәнәгать һәм сәүдә министры урынбасары Хәмзә Баһманов, “ТАИФ” ААҖ генераль директоры Альберт Шиһабетдинов һ.б. катнашты.

Татарстан Премьер-министры Илдар Халиков Кытай компаниясе вәкилләренә республика Россиянең инвестицион җәлеп итүчән төбәге булып тора, дип белдерде. Ernst&Young компаниясе белән “Forbes” журналы 2011 ел нәтиҗәләре буенча Татарстанны бизнес алып бару өчен иң яхшы төбәк дип атады, дип билгеләп үтте республиканың Хөкүмәт җитәкчесе. “Кытай Халык Республикасы Татарстан Республикасы, шулай ук Россия өчен мөһим партнер булып тора, - дип ассызыклады Илдар Халиков. – Татарстан аша Ауропа-Көнбатыш Кытай халыкара логистика коридоры уза, тиздән ул Үзәк Азия төбәкләренә йөк ташу буенча төп маршрутка әйләнәчәк”.

Бүген ТР Президенты Казанның “Химград” технополисында – Киров районы территориясендә урнашкан заманча индустриаль комплекста булды. Бу комплекс үз территориясендә химия һәм полимер продукцияне эшкәртү өлкәсендә кече һәм урта компанияләрне урнаштыруны күзалдында тота.

Рөстәм Миңнеханов, аны озата барган ТР беренче вице-премьеры Равил Моратов һәм башка рәсми затлар ике яңа җитештерү бинасын карады, аның берсендә технополис резидентларының сәнәгать мәйданнары, икенчесендә логистик комплекс булачак.

Бүген Төркиянең Бурса шәһәрендә автомобиль төзелеше һәм автокомпонентлар җитештерү өлкәләрендә хезмәттәшлек итү буенча Татарстан-Төркия эшлекле форумы узды. Анда Татарстан Президенты Рөстәм Миңнеханов катнашты.
Форум эшендә Татарстан белән Төркиянең эшлекле даирәсеннән 200 дән артык вәкил катнаша. Алар Татарстан Республикасының 20 дән артык предприятиесен һәм Төркия Республикасының 50 дән артык компаниясен тәкъдим итә.
Татарстан эшлекле даирәсе вәкилләре Төркиягә сәфәр кысаларында, автокреслолар җитештерүче “Мартур”, автомобильләрнең металл кузов детальләрен җыючы “Джошкуноз” компанияләрендә, Автомобиль сәнәгате экспортерлары ассоциациясе техник сәнәгать лицеенда булды.
Бүген форумның пленар утырышында Төркия һәм Татарстан компанияләре вәкилләре чыгыш ясады. Автомобиль индустриясе экспортерлары оешмасы рәисе Улу даг Орхан Сабунджу Төркия дөньяда һәм Ауропада автомобильләр һәм автокомпонентларның иң эре экспортерлары булып тора. 2011 елда илдә 1,6 миллион автомобиль җитештерелгән, аларның өчтән ике өлеше читкә чыгарылган. 2023 елда Төркия ел саен 4 миллион автомобиль чыгарырга һәм экспорт күләмен 75 млрд. долларга җиткерергә ниятли. “Махсус икътисади зоналар” ААҖ генераль директоры Олег Костин Россиядә эшли торган МИЗ системасы турында сөйләде. Бүген Татарстанда урнашкан “Алабуга” МИЗ уңышлы эшли, дип билгеләп үтте ул.

ТР һәм Төркия бер-берсенә тарихи якын, шуңа күрә Татарстан Россиядә Төркия бизнесы өчен плацдарм була ала. Бу хакта бүген ТР Президенты Рөстәм Миңнеханов Бурса провинциясе губернаторы Шахабеттин Харпут белән очрашуында белдерде. Очрашу Бурсада, губернаторның рәсми резиденциясендә үтте.

Рөстәм Миңнехановны сәламләп, Шахабеттин Харпут сәфәрләре өчен аңа һәм Татарстан делегациясе вәкилләренә рәхмәтен белдерде. Ул әлеге сәфәр Татарстан-Төркия мөнәсәбәтләре үсешенә этәргеч булачагында ышанычын белдерде.

ТР Президенты, ТРга аерым игътибар өчен, Бурса провинциясе җитәкчелегенә һәм Төркия җитәкчелегенә рәхмәтен әйтте.

“Без бер-беребезгә тарихи якын, шуңа күрә Татарстан Россиядә Төркия бизнесы өчен плацдарм булырга тиеш”, - дип белдерде Рөстәм Миңнеханов.

Бүген ТР Президенты Рөстәм Миңнеханов белән Голландиянең DSM компаниясе генераль директоры һәм идарә рәисе Фейке Сибесманың Хөкүмәт йортында үткән очрашуында хезмәттәшлек перспективалары һәм уртак проектларны гамәлгә ашыру мөмкинлекләре каралды.

Очрашуда ТР Премьер-министры урынбасары – авыл хуҗалыгы һәм азык-төлек министры Марат Әхмәтов, РФ Дәүләт Думасының сәнәгать комитеты рәисе урынбасары Ирек Богуславский, “Челтәр компаниясе” ААҖ генераль диреткоры Илшат Фәрдиев, “Агросила групп” ЯАҖ генераль директоры Илдар Гыймадиев, DSM компаниясенең Россия/БДБ буенча президенты Владимир Бонгард һ.б. катнашты.