ЯҢАЛЫКЛАР

Бүген Татарстан Республикасы Президенты Рөстәм Миңнеханов РФ Президенты каршында эшмәкәрләр хокукларын саклау буенча тулы вәкаләтле вәкиле Борис Титов белән очрашты. 

Очрашу ТР Хөкүмәт Йортында узды, анда шулай ук ТР Премьер-министры Илдар Халиков һәм ТР Президенты каршындагы эшмәкәрләрнең хокукларын яклау буенча тулы вәкаләтле вәкил Тимур Нагуманов катнашты.

Яклар республикада эшмәкәрләрнең хокукларын яклау буенча тулы вәкаләтле вәкил институты эшчәнлегенә, әлеге өлкәдә эш тәҗрибәсенә, дәүләт хакимияте органнарының бизнес-омбудсмен белән багланышына бәйле мәсьәләләр турында сөйләштеләр.

Борис Титовның Казанга эш сәфәре кысаларында ТР Сәүдә-сәнәгать палатасы мәйданчыгында республика эшмәкәрләре җәмгыяте белән очрашу һәм ММЧ өчен матбугат конференциясе планлаштырылган. 

Бюджет методологиясе Департаменты директоры урынбасары Татьяна Саакян белән әңгәмә.

Бүген бюджет реформасы белән бәйле берничә мөһим темаларны аерып карарга була: дәүләт (муниицпаль) финанс контроленең бердәм системасын оештыру, инвестиицяләр һәм дәүләт хезмәтен күрсәтүгә бәйле товарларны сатып алу өчен бюджет чыгымнарының нәтиҗәлелеген арттыру. Бү мәсьәләләрнең барысы да РФ законнарының яңалыкларында чагылыш тапты. Әлеге әҗгәмәдә шушы төп үзгәрешләр турында сүз бара.

Татарстанда 2013 нче елның 1 ноябренә 1907,1 мең кв.м торак, яки еллык планның 79,5 проценты, сафка бастырылган. Бу хакта бүген ТР Хөкүмәт Йортында узган республика киңәшмәсендә ТР төзелеш, архитектура һәм торак-коммуналь хуҗалыгы министры Ирек Фәйзуллин хәбәр итте. Барлык муниципаль районнар белән видеоконференцэлемтә режимындагы киңәшмәне Татарстан Республикасы Президенты Рөстәм Миңнеханов уздырды. Киңәшмәдә шулай ук ТР Премьер-министры Илдар Халиков катнашты.

Ирек Фәйзуллин хәбәр иткәнчә, 1 ноябрьгә социаль ипотека республика программасы буенча планлаштырылган 383,3 мең кв.м торакның 259,9 мең кв.метры сафка бастырылган, бу планның 67,8 проценты, калганы – 123,4 мең кв.м. Графиктан күпкә артта калу Казан, Түбән Кама һәм Спас муниципаль районнарында бар.

Рөстәм Миңнеханов РФ Президенты каршындагы Икътисади совет президиумы составына кергән. Икътисади совет президиумы составы РФ Президентының 2013 нче елның 31 нче октябрендә имзаланган Указы (№818) белән расланган.  Икътисади совет президиумы “оператив мәсьәләләрне хәл итү өчен” булдырылган, аның рәисе - Владимир Путин.

Икътисади совет президиумы составына элеккеге РФ финанслар министры, Гражданлык инициативалары комитеты башлыгы Алексей Кудрин, РФ Хөкүмәте Рәисенең беренче урынбасары Игорь Шувалов, РФ вице-премьерлары Аркадий Дворкович һәм Ольга Голодец, РФ Президенты ярдәмчесе Алексей Белоусов, Үзәк банк рәисе Эльвира Нәбиуллина, РФ финанслар министры Антон Силуанов, РФ Икътисади үсеш министрлыгы башлыгы Алексей Улюкаев, Хисап палатасы рәисе Татьяна Голикова, Саклык банкы башлыгы Герман Греф, Мәскәү мэры Сергей Собянин һәм башкалар керә.

Бүген Татарстан Республикасы Президенты Рөстәм Миңнеханов Архангельск өлкәсенә эш визиты белән килде. Рөстәм Миңнехановны Архангельск шәһәре аэропортында Архангельск өлкәсе губернаторы Игорь Орлов, Архангельск өлкәсенең төбәк татар милли-мәдәни автономиясе рәисе Рим Кәлимуллин каршы алдылар.

Иң баштан Рөстәм Миңнеханов Игорь Орлов белән Северодвинск шәһәренә юл тоттылар, “ПО “Севмаш” ААҖ администрациясендә 2013-2016 нчы елларга Татарстан Республикасы белән Архангельск өлкәсе Хөкүмәте арасында сәүдә-икътисади, фәнни-техник һәм социаль-мәдәни хезмәттәшлек турындагы Килешүне тормышка ашыру буенча чаралар Планы имзаланды. 

 

Шуннан Рөстәм Миңнеханов һәм Игорь Орлов Татарстан Республикасы һәм Архангельск өлкәсе вәкилләре очрашуында катнаштылар.

ТР Президенты “ПО “Севмаш” музее экспозициясе белән танышты һәм музейның мөхтәрәм кунаклары китабында язма калдырды, ә аннан соң “Викрамадитья” авианосецын карады.

Бүген Татарстан Республикасы Президенты Р.Н. Миңнеханов Htoo (Мьянма) компанияләре төркеме рәисе Тей За әфәнде белән очрашты.

Очрашу Татарстан Республикасы Хөкүмәте Йортында узды, Татарстан ягыннан Татарстан Республикасы вице-премьеры – Татарстан Республикасы сәнәгать һәм сәүдә министры Равиль Зарипов, Татарстан Республикасы Президентының тышкы икътисадый эшчәнлек буенча ярдәмчесе Радик Гыйматдинов, “Казан вертолетлар заводы” ААҖ генераль директоры , Вадим Лигай, Татарстан Республикасы Сәүдә-сәнәгать палатасы һәм Татарстан Республикасы Инвестицион үсеш агентлыгы вәкилләре һәм башкалар катнашты.

Исегезгә төшерәбез, 2013 елның 23 сентябрендә Татарстан һәм Мьянма сәүдә-сәнәгать палаталары арасында Үзара аңлашу турындагы меморандумга имза салынган иде – бу вакыйга Татарстан Республикасы делегациясенең Мьянма Берлеге Республикасына визиты кысаларында узды. Документлар Мьянма белән Татарстан арасындагы сәүдә-икътисадый мөнәсәбәтләр үсешенә хезмәт итәчәк дип көтелә.

Urals маркалы нефтькә, россия экспортының төп товарына уртача бәя 2013 елның октябрендә баррель өчен 107,91 доллар тәшкил итте. Ун ай өчен уртача бәя баррель өчен 107,75 доллар тәшкил итте, дип хәбәр итте "Прайм" агентлыгына РФ Финанслар министры белгече Александр Сакович.

РФ Икътисад министрлыгы 2013 елның гыйнвар-сентябрь айларында Россиянең социаль-икътисади үсеш нәтиҗәләрен бастырды. Әлеге рәсми кәгазьдән күренгәнчә, 9 ай нәтиҗәләре буенча тупланма бюджетның салым керемнәренең яртысыннан артыгын формалаштыручы төбәкләр арасында Татарстан Республикасы, Мәскәү һәм Самара өлкәләре, Ханты-Мансийск һәм Ямало-Ненецк автоном округлары, Мәскәү һәм Санкт-Петербург шәһәрләре керә. 2013 елның гыйнвар-август айларында алар барлык салым һәм җыемнарның 55% туплаганнар. Ел башыннан Россия Федерациясененең бюджет системасына барлыгы 7 293,6 млрд. сум салымнар һәм башка түләүләр кергән.

2013 елның 9 ае эчендә Татарстан Республикасы берләштерелгән бюджетына 142,9 млрд. сум кергән, шул исәптән салым һәм салым булмаган керемнәр – 117,4, кире кайтарылмый торган кертемнәр – 25,5 млрд. сум. Бу хакта бүген Татарстан Республикасы Хөкүмәте Йортында узган киңәшмәдә Татарстан Республикасы финанс министры Радик Гайзатуллин хәбәр итте.

Киңәшмәне республиканың барлык муниципаль районнары белән видеоконференцэлемтә режимында Татарстан Республикасы Президенты Р.Н. Миңнеханов уздырды.

Радик Гайзатуллин хәбәр иткәнчә, республика бюджетына салым һәм салым булмаган керемнәр 91,0 млрд. сум күләмендә кергән.

2013 елның 9 ае эчендә җирле бюджетларга 26,5 млрд. сум салым һәм салым булмаган керемнәр кергән. Табышка салым 35,5 млрд. сум күләмендә, акцизлар - 12,1 млрд. сум.

2013 елның 9 ае эчендә Татарстан Республикасында үз керемнәребез 117,4 млрд. сум күләмендә тупланган. Бүген бу хакта Татарстан Республикасы Президенты Р.Н. Миңнеханов Татарстан Республикасы финанс, казначылык һәм салым органнарының республика киңәшмәсендә хәбәр итте.

Киңәшмә Татарстан Республикасы Хөкүмәте Йортында республиканың барлык муниципаль берәмлекләре белән видеоконференцэлемтә режимында узды.

“2013 елның 9 ае эчендә безнең территориядән акча кертүләр 248,9 млрд. сум тәшкил иткән, бу 2012 елның шул чоры белән чагыштырганда артыграк булып чыга, - диде Рөстәм Миңнеханов. – Төп өлеше - 141,7 млрд. сум - нефтькә таможня пошлинасыз чаралар, ягъни чиста салым түләүләре, аларны Татарстан Республикасы федераль бюджетка кертте”.